ዑደት ኢሳይያስ ናብ ቻይና?

ፕረዚደንት ኢሳይያስ ኣፍወርቂ ብዕድመ ፕረዚደንት ሺ ጂንፒንግ ንኣርባዕተ መዓልታት ዝጸንሕ ወግዓዊ ዑደት ንምክያድ ብ13 ግንቦት ናብ ቻይና ኣትዩ።

እቲ ዑደት ኣብ መንጎ ክልቲኤን ሃገራት ዘሎ ክልተኣዊ ሽርክነት ዝያዳ ዘጠናኽርን ኣብ ፖለቲካዊ፣ ቁጠባዊ፣ ፋይናንስ፣ ልምዓታዊ፣ ንግዳዊ ጉዳያት ክዝትዩ ትፅቢት ይግበር።

.ምሕያል ክልተኣዊ ምሕዝነት

ፕረዚደንት ኢሳይያስ ኣፍወርቂ ናብ ቻይና ዘካየዶ ዑደት፡ ኣብ መንጎ ክልቲአን ሃገራት ዘሎ ዝምድና ዘንጸባርቕ ብምዃኑ ትርጉም ዘለዎ’ዩ።

ኤርትራ ኣብ ኣፍሪቃ ኣገዳሲት መሻርኽቲ ቻይና ኮይና፡ ቻይና ድማ ኣብ ኤርትራ ብፍላይ ኣብ መዳያት ትሕተ ቅርጽን ተፈጥሮኣዊ ሃብትን ኣውፋሪት ኮይና ጸኒሓ እያ።

ኣብዚ ዑደት ክልቲኦም መራሕቲ ኣብ ፖለቲካዊ፣ ቁጠባዊ፣ ፋይናንስ፣ ልምዓትን ንግዳዊ ጉዳያትን ትኹረት ብምግባር፣ ነዚ ሽርክነት ብዝበለጸ ንምድልዳል ዝሕግዙ መንገድታት ክዘራረቡ ትጽቢት ይግበር። ፕረዚደንት ኢሳይያስ፡ ሚኒስተር ጉዳያት ወጻኢ፡ ሚኒስተር ፋይናንስን ሃገራዊ ልምዓትን፡ ከምኡ’ውን ሚኒስተር ንግድን ኢንዳስትሪን ዝርከብዎም ሓያሎ ሚኒስተራት ብምዕጃቡ፡ ኣገዳስነት ናይዞም ጉዳያት ንኤርትራ ዘብርህ’ዩ።

.ዞባውን ኣህጉራውን ጉዳያት

ክልቲኦም መራሕቲ ካብ ክልተኣዊ ጉዳያት ብተወሳኺ ኣብ ዞባዊን ኣህጉራውን ዛዕባታት እውን ክዘራረቡ እዮም።

ቻይናን ኤርትራን ንኣህጉራውን ዞባውን ጉዳያት ብዝምልከት ጥቡቕ ርክብን ምውህሃድን ኣቐሚጠን ኣለዋ፣ እዚ ምብጻሕ’ዚ ድማ ነዚ ምትሕብባር’ዚ ዝያዳ ንምሕያል ዕድል ዝፈጥር’ዩ።

እቲ ናይ ቻይና ኣብ ኣፍሪቃ እናዓበየ ዝኸይድ ዘሎ ጽልዋን ምስታ ኣህጉር ዘለዋ ምትእስሳርን ንምዕማቕ እትገብሮ ዘላ ጻዕርን’ውን ትርጉም ዘለዎ’ዩ። ኤርትራ ብስትራተጂካዊ ኣቀማምጣ ኣብ ቀርኒ ኣፍሪቃ ንቻይና ኣብዚ ዞባ ኣገዳሲት መሻርኽቲ እያ።